"தமிழோடு"

http://youthful.vikatan.com/youth/uzhavanpoem030309.asp

வான்மீகியின் இயற்பெயர் தெரியுமா உங்களுக்கு?

2009-03-18T11:31:00.000+05:30

இந்தியாவில் முதலில் தோன்றிய காப்பியம் "இராமாயணம்". இந்த இராமாயணத்தை வடமொழியில் இயற்றியவர்தான் வான்மீகி என்பது யாவரும் அறிந்ததே.

கல்வி, இறைவழிபாடு, ஒழுக்கம் முதலியவற்றில் சிறந்து விளங்கிய வான்மீகி தவவாழ்க்கை மேற்கொண்டார். தவவாழ்க்கை மேற்கொண்ட வான்மீகி, இருந்த இடம் விட்டு நீங்காமல் நெடுங்காலம் தவம் புரிந்தார். அவ்வாறு தவம் புரிந்ததால், அவர் இருந்த இடத்தில் அவரைச் சுற்றிக் கரையான் புற்று தோன்றி வளர்ந்தது. வளர்ந்து அவரது உடலையே மறைத்துவிட்டதாம்.

அவ்வாறு தவம் புரிந்த வான்மீகி, தம் தவத்தை முடித்துக் கொண்டு அக்கரையான் புற்றிலிருந்து வெளியே வந்தார். வடமொழியில் வான்மீகம் என்பது கரையான் புற்றைக் குறிக்குமாம்.

கரையான் புற்றிலிருந்து வெளியே வந்த காரணத்தால் அவருக்கு வான்மீகி என்று பெயர் உண்டாயிற்று.

இக்காரணப் பெயர் தோன்றி வழங்கி வரவே, அவருடைய இயற்பெயர் அறிய முடியாத அளவிற்கு மறைந்து விட்டது.

இயற்பெயர் என்னவென்றே தெரியாமல்போய், காரணப் பெயரே ஒருவருக்கு இயற்பெயரானதை எண்ணி இன்றும் உலகம் வியக்கிறது.

-செந்துறை முத்துவின் 'காப்பியம் பிறந்த கதை' நூலிலிருந்து.

பெரியவங்க இப்படி சொல்லியிருக்காங்க...

2009-03-17T12:17:00.000+05:30

பொன் மொழிகள்:

31. பாதையைத் தேடாதே. உருவாக்கு. - லெனின்

32. தவறான பாதையில் வேகமாகச் செல்வதைவிட, சரியான பாதையில் மெதுவாகச் செல். - புத்தர்

33. பணத்தைக் கொண்டு கடவுளைக் கண்டுபிடித்துவிட முடியாது.

34. சும்மா ஆடுற பேய்க்கு சாம்பிராணி புகை போட்டால் சொல்லவா வேண்டும்.

35. சொல்லக் கூடாத பேச்சானால் அதை சொல்லாமல் இருப்பதே மேல். - மகாவீரர்

36. குரு மொழி கேளார் நற்கதி பெறார். - கீதை

37. காலத்துக்கு பாகுபாடு கிடையாது. யார் மீதும் அதற்குப் பாரபட்சம் இல்லை. - தாமஸ்மான்

38. நீ அமைதியாக வாழ விரும்பினால் சந்தேகப்பேர்வழியாக இராதே.

39. வாழ்க்கை இரண்டு பகுதிகளை உடையது. சென்ற காலம் ஒரு கனவு. வருங்காலம் ஓர் ஆசை.

40. அன்புள்ள இடத்தில் நீர் இனிக்கும். - கன்பூசியஸ்

விகடனில் என் கவிதை - ஈழத் தாலாட்டு!

2009-03-04T12:31:00.000+05:30

ஈழத் தாலாட்டு!

ஆராரோ ஆரிரரோ

என் செல்ல மகனே

ஈழம் காக்க இங்கு பிறந்த

வேழம் தானே நீயடா

என் செல்ல மகனே !

மேலும் படிக்க ...

இதே கவிதை என் வலைப்பூவில்..

http://tamiluzhavan.blogspot.com/2009/01/blog-post_22.html

அன்புடன்,

உழவன்

பாராளுமன்ற தேர்தல்: ஆன்லைனில் வாக்கு?

2009-03-03T14:43:00.002+05:30

ஒவ்வொரு வாக்காளரும் கண்டிப்பாக வாக்களிக்க வேண்டும் என்று தேர்தல் கமிஷனும், அரசில் தலைவர்களும் சொல்வது வழக்கம். தொடர்ந்து வாக்களிக்காமல் இருப்பவர்களின் ரேஷன் கார்டு பறிக்கப்பட வேண்டும் என்பன போன்ற பல உரிமைகளைப் பறிக்கவேண்டும் எனவும் பலர் சொல்வதுண்டு.

ஒவ்வொரு வாக்காளரும் தங்களது வாக்கை தவறாமல் அளிக்கவேண்டும்; இல்லையெனில் உங்கள் வாக்கை மற்றவர்கள் தவறாக பயன்படுத்த நேரிடும் என சொல்வது சரியான கருத்துதான். ஆனால் இந்திய அரசு அவ்வாறு தவறாமல் வாக்களிப்பதற்கு என்னென்ன வசதி வாய்ப்புகளை ஏற்படுத்தித் தந்திருக்கிறது என்று பார்த்தால் எதுவுமில்லை. (சமீபத்தில் வெளியான 'தீ' திரைப்பட இயக்குநர் கண்டிப்பாக இதற்கு பதிலளிக்கவேண்டும் என விரும்புகிறேன்)

உதாரணமாக, தமிழகத்தின் தென்முனையிலிருந்து பிழைப்புத் தேடி சென்னைக்கு வந்துள்ள ஒருவனால், வாக்களிப்பதற்காக குறைந்தது ஆயிரம் ரூபாய் செலவழித்து எப்படி தன் சொந்த ஊருக்கு செல்லமுடியும்? ஒருவேளை ஆயிரம் ரூபாய் செலவழிக்கக்கூடிய நிலையில் அவன் இருந்தாலும், அரசு விடுகின்ற ஒரு நாள் விடுமுறையில், கிட்டத்தட்ட போகவர முப்பது மணிநேர பயணம் செய்து சென்றுவர இயலுமா?

சாதாரண வார இறுதிகளிலேயே எஃமோரும், கோயம்பேடும் நிரம்பி வழிகின்ற போது, கண்டிப்பாக வாக்களிக்க வேண்டும் என்ற கட்டாயம் இருந்தால், தேர்தல் நாளுக்கு முந்தைய நாளில் எந்த அளவுக்கு கூட்டம் நிரம்பி வழியும்? இப்படிப்பட்ட சூழல் நிலவுகின்றபோது, கட்டாயம் வாக்களிக்கவேண்டும் என்று எப்படி அரசாங்கத்தால் சொல்லமுடியும்?

வாக்களர்கள் இந்திய தேசத்தில் எந்த மூலையில் இருந்தாலும், அவர்களால் அவர்களின் தொகுதி வேட்பாளர்களுக்கு வாக்களிக்கக் கூடிய வசதியை ஏற்படுத்தித் தரவேண்டியது அரசின் கடமை.

வேறொரு தொகுதியில் இருந்து கொண்டு, தன்னுடைய தொகுதிக்கு வாக்களிக்கும் முறையை அமல்படுத்த அரசுக்கு சில யோசனைகள்:

அ) வேறு தொகுதி வேட்பாளர்களுக்கு வாக்களிப்பதற்கென்று தனியாக வாக்குச் சாவடிகள் அமைக்கலாம். எல்லா ஊர்களிலும் அமைப்பதற்குப் பதிலாக மாவட்டத் தலைநகரங்களில் மட்டும் அமைத்தாலே போதுமானது.

ஆ) அருகிலிருக்கும் தபால் நிலையத்திலோ, அரசு வங்கிகளிலோ அல்லது ஏதேனும் அரசு அலுவலகங்களில், நான் இந்த தொகுதியில் இருந்துகொண்டு, என் வாக்குரிமை இருக்கும் இந்த தொகுதிக்கு வாக்களிக்க போகிறேன் என்று தேர்தலுக்கு முன்கூட்டியே, தகுந்த ஆவணங்களைக் காட்டி முன்பதிவு செய்து விட்டால், நமது சொந்த ஊரில் நமக்கிருக்கும் வாக்குரிமையை தற்காலிகமாக வேறு இடத்திற்கு மாற்றிக் கொடுப்பது எளிதானதுதான்.

இ) இவ்வாறு வாக்களிப்பவர்களுக்கு, மின்னணு இயந்திரம் மூலமாக வாக்களிப்பதில் சாத்தியக்கூறுகள் குறையும் பட்சத்தில், இவர்களூக்கு மட்டும் வாக்குச்சீட்டு முறையையே அமல்படுத்தலாம்.

ஈ) தகவல் தொழில்நுட்பம் வளர்ந்துள்ள இக்காலத்தில், ஆன்லைனில் வாக்களிக்கும் முறையை அமல்படுத்த திட்டமிடலாம்.

அனைவருக்கும் புகைப்படத்துடன் கூடிய வாக்களர் அடையாள அட்டை மட்டுமல்லாது, புகைபடத்துடன் கூடிய வாக்காளர் பட்டியலும் இருக்கிறபோது, மேற்கூறிய முறைகளை நடைமுறைப்படுத்துவதில் சிக்கல் ஒன்றும் இருக்காது என்றே தோன்றுகிறது.

உழவன்

BLOCKED::mailto:tamil.uzhavan@gmail.com

'ஏ', 'ஓ' 'கே' 'கோ' இந்த எழுத்துக்கள் தமிழுக்கு வந்த கதை

2009-03-02T12:46:00.000+05:30

தமிழில் புதுமைக் கலைத்துறையைத் தோற்றுவித்த வீரமாமுனிவர், திருக்காவலூரில் வேதியர்களுக்காக ஒரு கல்லூரி அமைத்தார். அக்கல்லூரியில் தாமே ஆசிரியராக அமர்ந்து இலக்கணம் கற்பித்தார்.

வீரமாமுனிவர் திருக்காவலூர்க் கல்லூரியில் இலக்கண ஆசிரியராக இருந்தபோது, தமிழ் இலக்கண நூல்களை ஆழ்ந்து ஆராய்ந்தார். தொல்காப்பியம் முதல் நன்னூல் வரை உள்ள எல்லா இலக்கண நூல்களையும் நன்கு ஆராய்ந்தார். அதன் விளைவாக "தொன்னூல் விளக்கம்" எனும் அரிய இலக்கண நூல் இயற்றினார்.

தொல்காப்பியர் காலத்தில் 'எ'கர, 'ஒ'கர எழுத்துகட்கு மேலே புள்ளி வைத்து எழுதப்பட்டன. அவ்வாறு புள்ளி பெறுவன மெய்யெழுத்துக்களாகும். புள்ளி பெறாமல் அமையும் 'எ'கர 'ஒ'கரங்கள் நெட்டெழுத்துகளாகக் கருதப்பட்டன. இதனால் வேறுபாடு தெரியாது மக்கள் இடருற்றனர். இந்த மருட்சியைப் போக்க, வீரமாமுனிவர் 'எ'கர 'ஒ'கரங்களுக்கு நீண்ட புள்ளியையும், மெய்யெழுத்துகட்குச் சுழித்த புள்ளிகளையும் அமைத்து வேறுபடுத்திக் காட்டினார். இதனால் 'ஏ', 'ஓ' வடிவங்கள் உண்டாயின.

அவ்வாறே குறிலுக்கும் நெடிலுக்கும் ஒரே மாதிரியாக "கெ' 'கொ' என்று அமைந்த இடத்தையொட்டி குறிலா, நெடிலா என்று அறியமுடியாதவாறு இருந்த இன்னலைப் போக்கி குற்றெழுத்துக் கொம்புகளை மேலே சுழித்து 'கே' 'கோ' எனத் திருத்தியமைத்தவரும் இவரே.

'நீட்டல் சுழித்தல் குறில் மெய்க்கிடுபுள்ளி' எனத் தம்முடைய தொன்னூல் விளக்கத்தில் விதியும் வகுத்தார். நிறுத்தப்புள்ளி, முற்றுப்புள்ளி போன்ற குறியீடுகளை உண்டாக்கியவரும் இவரே.

தொன்னூல் விளக்கம் என்னும் இவரது இலக்கணநூல், நன்னூலை ஒத்து விளங்குவது. ஆனால், நன்னூல் எழுத்திற்கும், சொல்லிற்கும் மட்டுமே இலக்கணம் கூறுவது. வீரமாமுனிவரின் தொன்னூல் விளக்கம் எழுத்து, சொல், பொருள், யாப்பு, அணி ஆகிய ஐந்திலக்கணங்களையும் கூறுவதாகும்.

-செந்துறை முத்துவின் 'காப்பியம் பிறந்த கதை' நூலிலிருந்து.

வீழ்ந்தது சிங்கள்வன் ஆட்சி! திகைப்பூட்டும் செய்தி..

2009-02-26T13:31:00.001+05:30

நன்றி: மாலைமலர்

அரிசி aRice- ஒரு வேடிக்கையான சொல்லாராய்ச்சி

2009-02-24T12:48:00.002+05:30

ஆங்கிலேயன் நம்மையாண்ட காலம்:

(வெள்ளைக்காரன் பேசுகிற எல்லா டயலாக்கையும் அவன் ஸ்டைல்ல படிக்கவும்.)

ஏய்.. குப்சாமி, எல்லா பிரெட் ரோஸ்ட் பண்ணி எடுத்திட்டு வா..

சரிங்க துரை. இதோ பைவ் மினிட்ஸ்ல வந்திடுறேன். ("இந்த காஞ்சிபோன ரொட்டியை எப்படித்தான் மூணுவேளையும் தின்பாங்களோ. இத திங்க கையில கத்தி வேற" இப்படி குப்புசாமி மனசுக்குள்ள நினைச்சுக்கிடுறார்)

குப்சாமி.. உங்க வீட்ல என்ன ஃபூட்?

சோறு துரை.. அரிசிச் சோறு

அர்ஸ் சோர்?? கொஞ்சம் என்க்கும் வேணும். நா சாப்டு பாக்குது. சாப்பிட்டு பார்க்கிறார் வெள்ளைக்கர துரை.

வாவ்.. சூப்பர் குப்சாமி. எப்டி பண்ணுவீங்க?

அரிசிய வேகவைக்கனும் துரை.

வேகவைக்கனும் னா?

ம்..ம்.. பாயில்.. பாயில் பண்ணனும்.

ஒகே.. டெய்லி குப்சாமி என்கு அர்ஸ் கொண்டு வருது. ஒகே?

இப்படியாக, வெள்ளைக்காரன் உச்சரித்த "அரிசி" என்ற வார்த்தை, காலப்போக்கில் மாற்றமடைந்து இன்று "ரைஸ்" என்று வந்துள்ளது. அரிசி என்ற வார்த்தையை ஆங்கிலத்தில் அப்படியே aRICE என்று எழுதியபின், எப்பொழுது முதல் எழுத்து "a" மறைந்ததோ தெரியவில்லை.

தகவல்: பள்ளியில் தமிழாசிரியர் சொல்லக் கேட்டது.

சுடுகாட்டில் கலைஞரின் "சிரிப்பொலி" ?

2009-02-20T11:00:00.003+05:30

"தமிழகம் ஒரு அமைதி பூங்கா" இப்பொழுது இந்த வாக்கியத்தைச் சொல்வதற்கு சற்று கூச்சமாகத்தான் இருக்கிறது. காவல் நிலையத்தின் படிக்கட்டுகளையும், நீதிமன்றத்தின் படிக்கட்டுகளையும் மிதிப்பதற்கு வெட்கப்பட்ட நிலைபோய், பயப்படுகின்ற ஒரு நிலைமை பொதுமக்களுக்கு இன்று ஏற்பட்டுள்ளது.

பாராளுமன்றம், சட்டசபை, நகர்மன்றக் கூட்டங்கள் இங்கெல்லாம், மக்களால் தேர்ந்தெடுக்கப் பட்டவர்கள் நாற்காலிகளையும், மைக்குகளையும் வைத்து டைம்பாஸ் செய்துகொண்டிருக்க, இங்கு காவல்துறையும், நீதித்துறையும் கற்களையும், முட்டைகளையும் வைத்து விளையாடிக் கொண்டிருக்கிறார்கள்.

அங்கேயும் தமிழனின் இரத்தத்தில்தான் புத்த போதனைகளை எழுதிக்கொண்டிருக்கிறான் (சிங்)கள்வன். இங்கேயும் நம் இரத்தத்தின் மேல்தான் சட்டம் ஒழுங்கு நடந்துகொண்டிருக்கிறது.

ஆம். நீதிதேவன் கோவிலிலும் இரத்த அபிசேகம்.

பாரிமுனை என்றதும், முல்லைக்கு தேரீந்த பாரி தான் என் நினைவுக்கு வருவான். ஆனால் இன்று ,அங்கு முல்லையின் வாசனைக்குப் பதிலாக, இரத்த வாடையும், முட்டை வாடையும்தான் வருகிறது.

அன்றொருநாள் கைகட்டி, வாய்பொத்தி வேடிக்கை பார்த்த அதே காவல்துறைதான், இன்று கைநீட்டி, கம்பெடுத்து வெறியாட்டம் நிகழ்த்தியிருக்கிறது.

(பொதுமக்கள் கம்பெடுத்து சுத்துனா, அது வெறும் சிலம்பாட்டம்; ஆனா போலீஸ் கம்பெடுத்தா, அவங்க ஆடுறது வெறியாட்டம்)

இலங்கைத் தமிழர்களுக்காக நடத்தப்படும் போராட்டங்களில் வழக்கறிஞர்களின் பங்குதான் அதிகமாக இருக்கும் நிலையில், அவர்களின் மீது இப்படிப்பட்ட கொலைவெறித் தாக்குதலை ஏவிவிட்டதின் பின்னனியில் இருப்பது யார்? மத்திய அரசா இல்லை மாநில அரசா? கலவரத்தை அடக்குவதற்காகக் கொடுக்கப்ப்ட்ட லத்திகள் கார்களின் கண்ணாடிகளையும் உடைத்ததைப் பார்க்கும்போது, யாருடைய ஏவுதலும் இலலாமல் காவல்துறை இப்படிப்பட்ட கண்மூடித்தனமான நிலையை மேற்கொள்ளுமா என்றே எண்னத்தோன்றுகிறது.

எண்ணற்ற ஊடகங்கள், அத்தனை சம்பவங்களையும் நொடிப்பொழுதில் அப்பட்டமாகப் படம்பிடித்துக் காட்டுகிற இந்த நவீன காலத்திலும், எதற்கும் பயம் இல்லாமல் கேமராக்களின் முன்னாலேயே கோஷ்டி மோதல் நடைபெறுகிறதென்றால், நமது சட்டங்களின் மீது யாருக்கும் எந்த பயமும் இல்லை என்றுதானே பொருள். ஆள்பவர்கள் தங்களுக்குச் சாதகமாக சட்டங்களை இயற்றுவதும், அகற்றுவதும், பயன்படுத்துவதுமாக இருந்தால், மக்களுக்கு எப்படி அந்த சட்டங்களின் மீது மரியாதை வரும்?

நீதிமன்ற வளாகத்தினுள் கற்களைக் குவித்து வைத்திருக்கும் தமிழக அரசே, அதை அள்ளிக்கொண்டுபோய் எங்கள் ஊர்ச் சாலைகளில் கொட்டுங்கள். புரோஜனமாகவாவது இருக்கும்.

தவறு யார் மீது இருக்கிறது என்று பார்ப்பது ஒருபுறம் இருக்கட்டும்; இப்படிப்பட்ட ஒரு கலவரம் நடைபெற்றதற்காகவே தமிழக அரசு வெட்கித் தலைகுனியவேண்டும். காவல்துறைக்குப் பொறுப்பேற்றுள்ள முதல்வர் அவர்கள் என்ன செய்யக் காத்திருக்கிறாரோ தெரியவில்லை.

முதல்வரின் இப்போதைய கவலையெல்லாம், சன் டிவிக்குப் போட்டியாக, புதுத் தொலைக்காட்சி ஆரம்பிப்பதில்தான் இருக்கிறது என்றே சொல்லலாம். நேற்றைய வன்முறைக் காட்சிகளைப் பார்த்தபோது, தமிழகம் விரைவில் சுடுகாடாக மாறினாலும் ஆச்சரியப்படுவதற்கில்லை. இந்த நிலையில் அவர்கள் "சிரிப்பொலி" சேனல் ஆரம்பிக்கப் போகிறார்களாம். சுடுகாட்டில்தான் கலைஞரின் "சிரிப்பொலி" சத்தம் கேட்குமோ?

உயர்நீதிமன்ற வளாகத்தில் நடைபெறுகின்ற சம்பவங்களையெல்லாம் பார்க்கும்போது, இது "உயர்நீதி" மன்றமா இல்லை "தாழ்வுநீதி" மன்றமா என்றே எண்ணத்தோன்றுகிறது. இப்படிப்பட்ட நீதிமன்றங்களைவிட, பதினெட்டுப் பட்டிக்கும் தீர்ப்பு சொல்லும் நாட்டாமை இருக்கிற ஆலமரத்தடியே மேல்.

உழவன்

mailto:tamil.uzhavan@gmail.com

சல்யூட்

2009-02-15T18:44:00.001+05:30

காலையில் அலுவலகத்தில் நுழையும் அத்தனை மேலதிகாரிகளுக்கும் சல்யூட். அவர்கள் எப்பொழுதெல்லாம் வெளியே செல்கிறார்களோ அப்போதும், எப்போதெல்லம் மீண்டும் உள்ளே வருகிறார்களோ அப்போதும் சல்யூட் அடிக்கும் நிலை. சில நேரங்களில் வருவது யார், போவது யார் என்றும்கூட தெரியாமல் அவர்களின் தோற்றத்தை வைத்தே சல்யூட் அடிக்கும் நிலை வேறு. இப்படி எந்த நேரமும் சல்யூட் அடிப்பதைப் பார்க்கும்போது, மனதினுள் ஏதோ ஒரு இனம்புரியாத வலி பெரும்பாலானவர்களுக்கு ஏற்பட்டிருக்கலாம்.

இதே நிலைதான் பெரிய செல்வந்தர்களின் வீடுகளில் (பங்களா) வேலைபார்க்கும் செக்யூரிட்டி/வாட்ச்மேன் களுக்கும். பெரியவர்கள் முதல் பள்ளிக் குழந்தைகள்வரை அனைவருக்கும் வரும்போதும், போகும்போதும் விரைப்பாய் நின்று சல்யூட் அடித்தாக வேண்டும். (இதுபோன்ற காட்சிகளை திரைப்படங்களில் அனைவரும் பார்த்திருக்கக்கூடும்)

தன்னோடு பணிபுரியும் சக நண்பர்களுக்கோ, மேலதிகாரிகளுக்கோ அல்லது முதலாளிகளுக்கோ ஹாய் சொல்லுவது, வணக்கம் சொல்லுவது, சல்யூட் அடிப்பது நல்ல பண்புதான். இது இருவருக்குமிடையே நல்ல ஆரோக்கியமான ரிலேஷன்சிப் வளர உதவும். ஆனால் நாம் இவர்களைப் பார்க்கும் ஒவ்வொரு முறையும் ஹாய்/குட்மார்னிங் என்று சொல்லுவதில்லை. அப்படி செய்தால் அது அவர்களைக் கிண்டல் செய்வது போலவோ இல்லை பைத்தியக்காரத் தனமாகவோதான் இருக்கும். ஆனால் செக்யூரிட்டி/வாட்ச்மேன் களுக்கு மட்டும் ஏன் இந்த நிலை?

பெரிய நிறுவனங்களிலுள்ள மேலதிகாரிகள் மனது வைத்தால், பார்க்கும் நேரமெல்லாம் சல்யூட் அடிக்கும் கலாச்சாரத்தை மாற்ற முடியும். பங்களாவில் வசிப்போர் தங்கள் குழந்தைகளுக்கும் சல்யூட் அடிக்க வேண்டும் என்பதற்குப் பதிலாக தங்களுக்குள் குட்மார்னிங் சொல்லிக்கொள்ளலாமே!

உழவன்
tamil.uzhavan@gmail.com
http://tamiluzhavan.blogspot.com/
http://tamizhodu.blogspot.com/

பத்துக்கு ஒரு சுழியம். மகாயுகத்திற்கு எத்தனை சுழியம்?

2009-02-15T18:39:00.000+05:30

1 = ஒன்று ONDRU - one
10 = பத்து PATTU - ten
100 = நூறு NOORU - hundred
1000 = ஆயிரம் AAYIRAM - thousand
10000 = பத்தாயிரம் PATTAYIRAM - ten thousand
100000 = நூறாயிரம் NOORAYIRAM - hundred thousand
1000000 = பத்து நூறாயிரம் PATTU NOORAYIRAM - one million
10000000 = கோடி KODI - ten million
100000000 = அற்புதம் ARPUTHAM - hundred million
1000000000 = நிகற்புதம் NIGARPUTAM - one billion
10000000000 = கும்பம் KUMBAM - ten billion
100000000000 = கணம் KANAM - hundred billion
1000000000000 = கற்பம் KARPAM -one trillion
10000000000000 = நிகற்பம் NIKARPAM - ten trillion
100000000000000 = பதுமம் PATHUMAM - hundred trillion
1000000000000000 = சங்கம் SANGGAM - one zillion
10000000000000000 = வெள்ளம் VELLAM - ten zillion
100000000000000000 = அந்நியம் ANNIYAM - hundred zillion
100000000000000000000 = ARTTAM - வேறு மொழியில்?
1000000000000000000000 = PARARTTAM - வேறு மொழியில்?10000000000000000000000 = பூரியம் POORIYAM - வேறு மொழியில்?100000000000000000000000 = முக்கோடி MUKKODI - வேறு மொழியில்?
1000000000000000000000000 = மகாயுகம் MAHAYUGAM - வேறு மொழியில்?

தகவல்: மின்னஞ்சலில் வந்தவை

உழவன் சொத்து

2009-02-14T13:00:00.002+05:30

எப்போதாவது

கார்மேகம்

காரித்துப்பும்

கரிசல்காடு

கலப்பை இழுத்த

களைப்பில்

கண்ணசரும்

காளை மாடு

ஒரு முடி

சோளத்தட்டையில்

ஒட்டுப் போட்ட

கூரை வீடு !

எருக்கள் சிதறி

ஏரோட்டி

எங்கள் பிழைப்பு

நகர்கிறது

அரை வயிரோடு

சொத்து மதிப்பில்

குறைந்திருந்தாலும்

உலகிற்கே

சோறு போடும் பாக்கியம்

எங்களுக்கு மட்டுமே !

உழவன்

மஞ்சள் சட்டை

2009-02-14T08:03:00.003+05:30

ஆடி மாத

அம்மன் கோவில்

பொங்கல் விழா!

பொழைக்க வந்த

பூமி விட்டு

பொறந்த பூமிக்கு

போகுற நேரமிது!

மாலையில ஏறிய ரயிலு வண்டி

மறுநாள் காலையில இறக்கிவிட

பெத்தவ(ள்) இருக்கும்

பக்கத்து ஊருக்குப் போக

மொத்தமா நாங்க காத்திருக்க

'கரிசல் குயில்' னு ஒட்டிய ஸ்டிக்கரோடு

கலர்புல்லா வந்தது மினி பஸ்!

கொண்டு வந்த உடைமையோடு

முண்டியடிச்சு உள்ளே ஏற

வண்டிக்குள்ள இடமில்லாம

ஏணி பிடிச்சு ஏறினோம் பஸ் மேல!

ஆடிக் காத்து லேசா அடிக்க

ஆனை போல அசைஞ்சு போறோம்

ஆண்டு ஒன்னு கழிஞ்சு போச்சு

ஆத்தா அப்பன பார்க்கப் போறோம்!

பனையோலைச் சத்தம் கேக்கும்போது

பதநீ குடிச்ச ஞாபகம்

சுடுகாடு வரும்போது

சுருக்குப்பை காசு தந்த

சுப்பம்மா பாட்டி ஞாபகம்

ஊருணி வந்திருச்சு

ஊருவாசம் அடிச்சிருச்சு

ஊரு எல்லை அய்யனாரை

உள்ளுக்குள்ள வணங்கியாச்சு!

ஆயிரம் நினைவுகள்

அரை நொடியில் வந்து போனாலும்

அவ நெனப்பு மட்டும்

அடி மனசுல தங்கிருச்சு!

அம்மனுக்குப் பொங்கல் வைக்க

எம்புள்ள வந்துட்டான்னு

பெத்தவ(ள்) அவ நினைக்க

ஏனிங்கு வந்தேன்னு

எனக்குத் தான தெரியும்!

போன வருஷப் பொங்கலுக்கு

மஞ்சத் தண்ணி ஊத்தி நனைச்சா

எம் மனசை ஈரமாக்கி

ஒரு வருஷமா தவிக்க வைச்சா!

நாளைக்கும் நீ ஊத்தனும்னு

மனசு கெடந்து தவிக்குது

உன் மஞ்சளுக்கு

என் சட்டை கெடந்து ஏங்குது!

உழவன்

காதல் கவிகள்

2009-02-14T08:03:00.002+05:30

இனிய காதலர் தின வாழ்த்துக்கள்!

***

பெறுநரைச்

சென்றடையாமலேயே

செல்லரித்துப்போன

காதல் கடிதங்களை

மனதிற்குள்ளேயே

சுமக்கும்

அனுப்புநர்களே

மண்ணில் ஏராளம் !

***

நிம்மதியில்லை

என்றதும்
கோவிலுக்குப்
போகச்சொன்னான் நண்பன்!
போனேன்
முதன்முதலில்
அவளைப் பார்த்த
பேருந்து நிறுத்தத்திற்கு!

***

உள்ளாடையைத்
தேர்ந்தெடுக்கக்கூட
இவ்வளவு நேரமா?
நீயெல்லாம்
பெண் பார்க்கப்போனால்...

எத்தனை பெண்தான் பார்ப்பாயோ..
என்பார்கள் நண்பர்கள்!

அவர்களுக்கென்ன தெரியும்
பார்த்த முதல் வினாடியே
உன்னைத்
தேர்வு செய்துவிட்டேன்
என்பது!

***

தெருவே
முகம் சுழித்து
மூக்கைப்
பொத்துகிற வேளையிலும்
நான் மட்டும்
அருகினில் சென்று
ரசித்துப் படிக்கிறேன்
உன் பெயரை
குப்பை லாரியில்!

***

அருவி

மலைக் காதலிக்கு

மழைக் காதலன்

சூட்டிய

மல்லிகை !

***

அவள் எனக்கு பிடிக்கவில்லை !

எத்தனை

பெண் பார்க்கும் படலம்

என்னவளுக்கு ...

விரைவில்

வீட்டில்

சொல்லியாக வேண்டும்!

உன்னை

பார்த்துவிட்டுச் சென்ற

எல்லோரும்

"அவள் எனக்கு பிடிக்கவில்லை"

என்றுதான்

சொல்லியிருக்கிறார்கள் ...

ஆமாம்...

யாருக்குமே

பிடிக்காத உன்னை

எனக்கு மட்டும்

எப்படி பிடித்துப் போனது?

ஓ..

இதுதான்

காதலோ !!!

***

உழவன்

மரம் வளர்ப்போம் !

2009-02-13T08:07:00.001+05:30

ஏற்றிச் செல்லும்

வண்டிகளைப்

பார்க்கும்போதுதான்

மனம் பதைக்கிறது.

இது

எத்தனை மரங்களின்

எலும்புத்துண்டுகளோ என்று !

உழவன்

தமிழரின் விருந்தோம்பல் - அன்றும், இன்றும்

2009-02-13T08:07:00.000+05:30

தமிழர்களின் பண்பாடுகளில் விருந்தோம்பலும் ஒன்று. விருந்து என்றால் புதுமை, புதியவர் என்று பொருள். விருந்தே புதுமை என்பார் தொல்காப்பியர். வீட்டிற்கு வரும் உற்றார், உறவினர், நண்பர்கள் அனைவரையும் விருந்தினர் என்கிறோம். ஆனால் பண்டைக்காலத்தில் வீடு தேடி வரும், முன் அறியாதவர்களையே விருந்தினர் என்றனர்.

போக்குவரத்து வசதிகள் இல்லாத அக்காலத்தில், கால்நடையாகத்தான் ஓரிடத்திலிருந்து மற்றோரிடத்திற்கு செல்லவேண்டியிருந்தது. அப்படிச் செல்லும்போது உணவிற்கும், தங்குவதற்கும் செல்லும் வழியில் இருக்கும் ஊர்களையே நம்பவேண்டியிருந்தது. ஆகவே புதிதாக வருவோர்க்கு பசிக்கு உணவளிக்க வேண்டிய நிலை இருந்தமையால் விருந்தோம்பல் பண்பாடு தமிழக இல்லங்களில் உருவாயிற்று. இப்படி வருவோர்கள் இளைப்பாறுவதற்கும், இரவு நேரங்களில் தங்குவதற்கும்தான் வீடுகளில் திண்னை வைத்துக் கட்டினார்கள்.

இன்றும் கிராமங்களில் செளமிட்டாய், ஐஸ், கொய்யாபழம், வளையல், உப்பு போன்றவைகளை விற்கும் வியாபாரிகள் வருவார்கள். அவர்கள் இளைப்பார திண்ணையில் இடமளிப்பதோடு, தண்ணீரும் தந்து உபசரிப்பார்கள். ஆனால் நகரங்களில் வீடு கட்டும்போது, தன்னுடைய இடத்தையும் தாண்டி, பக்கத்தில் ஒரு அடி, இரண்டு அடி என்று தள்ளி சுவர் எழுப்பும் நிலையில் இருக்கும்போது, திண்ணைக்கு எங்கே போவது.

விருந்தோம்பல் பண்பினை கம்பர், இராமனைப் பிரிந்து அசோகவனத்தில் இருக்கும் சீதையின் வாயிலாகக் கூறுவார்.

"அருந்து மெல்லடகு ஆரிட அருந்து மென்று அழுங்கும்

விருந்து கண்டபோது என்னுறுமோ என்று விம்மும்

மருந்தும் உண்டு கொல் யான்கொண்ட நோய்க்கென்று மயங்கும்

இருந்த மாநிலம் செல்லரித்திடவு மாண்டெழாதாள்" (கம்பராமாயனம்.காட்சிப்படலம்: 15)

என்ற பாடல் விருந்தினர்வரின் தானில்லாது இராமன் என்ன செய்வானோ என்று எண்ணிச் சீதை வருந்திய நிலையைப் புலப்படுத்துகிறது.

எங்கள் வீட்டில் எப்போதும் சமைக்கும்போது, எல்லோருக்கும் போக, அதிகமாக ஒரு நபர் சாப்பிடும் அளவிற்கு சமைப்பார்கள். பாட்டியிடம் ஏன் என்று கேட்டபோதுதான், திடீரென வீட்டிற்கு ஏதேனும் விருந்தினர் வந்துவிட்டால் அவர்களுக்கு உணவளிக்கவே இந்த உணவு என்பதைத் தெரிந்துகொண்டேன். ஆனால் இன்று நாங்கள் இந்த நேரத்திற்கு உங்கள் வீட்டிற்கு வருகிறோம் என்று முன்கூட்டியே தகவல் சொல்லாமல் சென்றாலோ, இல்லை வீட்டுப் பெண்கள் தொலைக்காட்சியில் சீரியல்கள் பார்க்கும் நேரத்தில் சென்றாலோ, சென்றவர் பாடு திண்டாட்டம்தான்.

நமது முன்னோர்கள் காலத்தில் கணவன் மனைவியிடையே எழும் ஊடலைத் தீர்க்கும் மருந்தாகவே விருந்தினர் அமைவர் என்று சொல்லப்பட்டுள்ளது. விருந்தினர் வந்தால், இருவரும் ஊடலை மறந்து கவனிப்பராம். ஆதலால் தன் மனைவியின் ஊடலைத் தீர்க்க யாரேனும் விருந்தினர் வரமாட்டார்களா என்று கணவன் ஏங்குவதாக நற்றினை கூறுகிறது.

விருந்தோம்பலுக்குத் தனி அதிகாரமே தந்த வள்ளுவர், முகர்ந்து பார்த்தாலே வாடிவிடக் கூடிய தன்மை படைத்தவர் விருந்தினர் என்றும், அவர் முகம் வாடாமல் விருந்தோம்பல் செய்யவேண்டும் என்பதை,

"மோப்பக் குழையும் அனிச்சம் முகந்திரிந்து

நோக்கக் குழையும் விருந்து"

என்பார்.

தொன்றுதொட்டு விளங்கும் விருந்தோம்பலை நாம் வளர்ப்போம்! நமது குழந்தைகளுக்கும் கற்றுத் தருவோமாக!

உடல் இளைக்கவும், பருக்கவும் தண்ணீரே காரணம்

2009-02-13T08:06:00.000+05:30

நீரை நாம் எல்லோரும் தினமும் பருகுகின்றோம். ஆனால் நீரை எப்படி, எப்போது, எந்த அளவுக்குக் குடிக்க வேண்டும் என்பதில் நாம் தெளிவாக இருக்கிறோமா என்றால் இல்லை. சாதாரணமாக நீரை நான்கு வகையாகப் பயன்படுத்தலாம்.

1. காய்ச்சாத குளிர்ந்த நீர்

2. கொதிக்க வைத்து ஆறிய நீர்

3. வெந்நீர்

4. மருந்து / மூலிகைகளுடன் சேர்த்துக் காய்ச்சிய நீர்

இப்படி தேவைக்கேற்றபடி நீரை ஆராய்ந்து அளவாகப் பருகினால் அது அமுதத்திற்கு ஒப்பாகும்.

கோடைக்காலம், இலையுதிர்க்காலம் தவிர மற்ற எல்லாக் காலங்களிலும் நீரைக் குறைவாகவே பருகவேண்டும். தேவைக்கு அதிகமாக நீரைப் பருகினால் உடலில் பித்தமும், கபமும் அதிகரிக்கும்.

வெந்நீர்

காய்ச்சலின்போது தாகத்துக்கு ஏற்றபடி வெந்நீர் பருகவேண்டும். கோரைக்கிழங்கு, பர்பாடகம், சுக்கு, வெட்டிவேர், விளாமிச்சைவேர், சந்தனம் இந்த ஆறு மூலிகைகளையும் சேர்த்துக் காய்ச்சிய நீரை சூடாகப் பருகுவது காய்ச்சலின் போது நன்மை பயக்கும்.

வெந்நீர் பசியை உண்டாக்கி, ஜீரண சக்தியை வளர்க்கும். உணவை ஜீரணிக்கச் செய்யும். தொண்டைக்கு நன்மை பயக்கும். சிறுநீர்ப்பையை தூய்மைப்படுத்தும்.

விக்கல், வயிற்று உப்புசம், வாதம், கபம், நாவறட்சி, இருமல், மூச்சுத்திணறல், ஜலதோஷம் இவற்றிற்கு வெந்நீரே சிறந்தது.

குளிர் நீர்

குளிர் நீர் பருகுவதால் குடிவெறி, உடல் களைப்பு, மயக்கம், வாந்தி, தலைச்சுற்றல், உடல் எரிச்சல், பித்தம் இவை நீங்கும்.

கொதிக்க வைத்து ஆறிய நீர்

கொதிக்க வைத்து ஆறிய நீர் எளிதில் செறிக்கும். களைப்பை நீக்கும். மூன்று தோஷங்களையும் போக்கும். ஆனால், கொதிக்க வைத்து ஆறி ஓர் இரவு தங்கிய நீர் வாதம், பித்தம், கபம் இந்த மூன்று தோஷங்களையும் வளர்க்கும்.

உணவு உட்கொள்ளும் வேளையில் மூன்று விதமாக நீரைப் பருகலாம்.

1. உணவு உட்கொள்வதற்கு முன்னால்

2. உணவு உட்கொள்ளும் போது

3. உணவு உட்கொண்ட பின்பு

இவ்வறு உட்கொள்ளும் நீரின் பயன்களும் ஒன்றுக்கொன்று வேறுபடும்.

உணவு உட்கொள்வதற்கு முன்னால்: உண்பதற்கு முன் பருகிய நீர் வயிற்றில் ஜீரண சக்தியைக் குறைக்கும். உடலை இளைக்கச் செய்யும்.

உணவு உட்கொள்ளும் போது: உணவுக்கு இடையே பருகும் நீரானது, உடலைப் பருக்கவோ, இளைக்கவோ செய்யாமல் சமநிலையில் வைக்கும். உடலில் தாதுக்களையும் சமநிலையில் வைத்துக்கொள்ளும். உணவை எளிதில் ஜீரணிக்க உதவும்.

உணவு உட்கொண்ட பின்பு: உண்ட பின்பு பருகும் நீரானது உடலிம் பருமனையும், கபத்தையும் ஏற்படுத்தும்.

- ஆயுள் வளர்க்கும் ஆயுர் வேதம் நூலிலிருந்து

பதினாறு பேறுகள் எவையெவை?

2009-02-12T07:38:00.001+05:30

"பதினாறும் பெற்று பெருவாழ்வு வாழ்க" என் வாழ்த்துவது நம் மரபு. இதற்கு பதினாறு மக்கட் செல்வம் பெற்று பெருவாழ்வு வாழ்க என பொருள் கொள்வோரும் உண்டு. பதினாறு பிள்ளைகளைப் பெற்ற பின்பு எப்படி பெருவாழ்வு வாழ்வது. அரசன் கூட ஆண்டி ஆகிவிடுவான்.

ஒருவன் வாழ்வில் பெறவேண்டிய பதினாறு செல்வங்கள் எவையென்பதை,

"துதி வாணி வீரம் விசயம் சந்தானம் துணிவு தனம்

அதிதானியம் செளபாக்கியம் போகம் அறிவு அழகு

புதிதாம் பெருமை அறம்குலம் நோயின்மை பூண்வயது

பதினாறு பேறும் தருவாய் மதுரைப் பராபரனே"

என்ற காளமேகப்புலவரின் பாடல் நமக்குப் புலப்படுத்துகிறது.

புகழ், கல்வி, வெற்றி, மக்கட்பேறு, துணிவு, செல்வம், மிகுந்த தானியம், சுகம், இன்பம், அறிவு, அழகு, புதிதுபுதிதாக ஏற்படக்கூடிய சிறப்புக்கள், அறவுணர்வுடைய குடிப்பிறப்பு, நோயற்ற வாழ்வு, நீண்ட வயது ஆகியவைகளே பதினாறு பேறுகள் ஆகும். இருந்தாலும் இவற்றினுள் சிறந்த பேறாகக் கருதப்படுவது மக்கட்பேறாகும்.

எனவேதான் வள்ளுவரும்,

"பெறுமவற்றுள் யாமறிவ தில்லை அறிவறிந்த

மக்கட் பேறல்ல பிற"

என்பார்.

மாநரக வாழ்க்கை

2009-02-12T07:38:00.000+05:30

ஏழு மாதமல்ல

ஏழு ஆண்டுகள் ஆனாலும்

எதிர் வீட்டில் இருப்பது

யாரென்று தெரிந்துகொள்வதில்லை!

எத்தனை மாதங்களோ

இதே பேருந்து நிறுத்தத்தில்தான்

ஏறுகிறேன் இறங்குகிறேன்

என்னோடு பயணிப்பவர்களிடம்

இதுவரை அறிமுகம்

ஆனதே இல்லை!

கோவில்

சந்தை

பேருந்து நிலையம்

கடைத்தெரு.. இப்படி

நாள்முழுக்க

எங்கெங்கு சுற்றினாலும்

உறவு சொல்லி அழைக்க

இங்கு யாருமில்லை - அட

எவரையேனும் எவராவது

அழைக்கும் குரல் கூட

காதில் விழுந்ததில்லை!

பட்டப் பகலில்

தெருமுனை வீட்டின்

பூட்டை உடைப்பதைப்

பார்க்கும் நாம்

ஐயோ பாவம்

சாவியைத் தொலைத்துவிட்டான் போலும்

என பரிதாபப் பட்டுக்கொண்டே

அவசரமாய் எங்கோ செல்கிறோம்

வீடு திரும்பும்போதுதான் தெரிகிறது

அந்த வீட்டில்

அத்தனையும் திருடு போனது!

கோலி, பம்பரம்

கில்லி, கிளித்தட்டு

கபடி, பாண்டி

எங்கே?

தியேட்டரும், பீச்சும் தான்

பொழுது போக்கு இங்கே!

இரவில் கூட வீட்டைப் பூட்டாத

என் கிராமத்து வாழ்க்கை - இங்கு

நாள் முழுக்க பூட்டிய வீட்டினுள்

புழுங்கியே கிடக்கிறது!

வெள்ளத்தில் வீடுகள் மிதந்தாலும்

குளிக்க ஒரு குளம் கூட இல்லையடா

குடிக்கும் ஒரு செம்பு தண்ணீரும்

இங்கு பணம் தானடா!

வாசல் தாண்டி வந்துவிட்டால்

எல்லோரும் இங்கு அநாதையடா!

செயற்கை சிரிப்பினில்தான்

நகருது நகர வாழ்க்கையடா!

உழவன்

எந்நாளும் அழியா "பொன்மொழிகள்"

2009-02-12T07:37:00.000+05:30

21. மரணத்தைப் பற்றிக் கவலைப்படாதே. நீ இருக்கும்வரை அது வரப்போவதில்லை. அது வரும்போது நீ இருக்கப் போவதில்லை! - விவேகானந்தர்

22. உலகம் உன்னை அறிவதைவிட, உன்னை உலகிற்கு அறிமுகம் செய்துகொள்! - அப்துல்கலாம்

23. தடம் பார்த்து நடப்பவன் மனிதன். தடம் பதித்து நடப்பவன் மாமனிதன்! -ஃபிடல் காஸ்ட்ரோ

24. நீ வெளிச்சத்தில் சென்றால் உலகமே உன்னைப் பின்தொடரும். ஆனால் நீ இருட்டினில் சென்றால் உன் நிழல் கூட உன்னைப் பின்தொடராது. - ஹிட்லர்

25. நம்மை வெல்ல யாரும் இங்கு பிறக்கவில்லை என்பது பொய். மற்றவரை வெல்ல நாம் இங்கு பிறந்திருக்கிறோம் என்பதே உண்மை!

26. முடிவெடு. அதை நீ முடித்துவிடு!

27. கோபம் என்பது பிறர் செய்யும் தவறுக்கு, உனக்கு நீயே கொடுத்துக்கொள்ளும் தண்டனை! - புத்தர்

28. நண்பன் சிறந்தவனாக இருக்கவேண்டும் என்று எண்ணாதே. அவன் சிறந்தவனாக இருக்க நீ உதவிகரமாக இரு! - தெரசா

29. வெற்றி என்பது உன் நிழல் போல. நீ அதைத் தேடிப்போகவேண்டியதில்லை. நீ வெளிச்சத்தை நோக்கி நடக்கும்போது, அது உன்னுடன் வரும்! -அப்துல்கலாம்

30. கஷ்டம் வரும்போது கண்ணை மூடாதே. உன்னைக் கொன்றுவிடும். கண்ணைத் திறந்து பார்; காணாமல் போய்விடும்! - அப்துல்கலாம்

தீவிரவாதிகளின் சொர்க்க பூமி பாக்- ஒபாமா

2009-02-11T07:42:00.001+05:30

வாஷிங்டன்: பாகிஸ்தான் தீவிரவாதிகளின் சொர்க்க பூமியாக திகழ்கிறது என்பதில் அமெரிக்காவுக்கு எந்த சந்தேகமும் இல்லை என்று அமெரிக்க அதிபர் ஒபாமா தெரிவித்துள்ளார்.

ஆப்கானிஸ்தானின் எல்லைப் பகுதியில் இருக்கும் பாகிஸ்தானின் வசீர்ஸ்தான் உள்ளிட்ட சில மாகாணங்களில் அல்-கொய்தா மற்றும் தாலிபான் திவீரவாதிகள் வெளிப்படையாகவே செயல்பட்டு வருகின்றனர்.

இந் நிலையில் ஆப்கானிஸ்தான் மற்றும் பாகிஸ்தான் பகுதிகளிலிருந்து தீவிரவாத நடவடிக்கைகளை முற்றிலுமாக அழிக்க ரிச்சர்டு ஹால்புரூக்கை சிறப்பு தூதராக நியமித்துள்ளார் ஒபாமா. தற்போது அவர் பாகிஸ்தானில் சுற்றுப்பயணம் மேற்கொண்டு வருகிறார். பின்னர் ஆப்கானிஸ்தான் சென்று அங்கிருந்து இந்தியா வந்து உயர்மட்ட அதிகாரிகளுடன் பேச்சுவார்த்தை நடத்துகிறார்.

இந்நிலையில் அதிபர் ஒபாமா அமெரிக்காவில் நிருபர்களிடம் கூறுகையில்,

பாகிஸ்தானின் பழங்குடியின மற்றும் வட மேற்கு எல்லை பகுதிகளில் தாலிபான் மற்றும் அல் கொய்தா தீவிரவாதிகள் அதிக அளவில் உள்ளனர். பாகிஸ்தான் தீவிரவாதிகளின் சொர்க்கமாக இருந்து வருகிறது. இங்கு தீவிரவாதிகளை முற்றிலும் அழிக்க போகிறோம் என்பதை பாகிஸ்தானுக்கு தெரிவிக்குமாறு ஹால் புரூக்கிடம் கூறியுள்ளேன்.

இவர்களை விரைவில் ஒழிக்க வேண்டும். அப்போது தான் நமது பாதுகாப்பு நோக்கம் முழுமையாக நிறைவேறும்.

பேச்சுவார்த்தையுடன் சேர்த்து ராணுவத் தாக்குதலையும் அதிகரிக்கும் நேரம் வந்துவிட்டது. ஆப்கானிஸ்தானில் இருந்து அமெரிக்க ராணுவம் எப்போது வெளியேறும் என்பதை இன்னும் முடிவு செய்யவில்லை. நாங்கள் முடிவு செய்திருப்பது எல்லாம் ஒன்று தான். அல் கொய்தா மற்றும் தாலிபான் தீவிரவாதிகளிடம் இருந்து அமெரிக்காவை பாதுகாக்க வேண்டும் என்பதே என்றார் ஒபாமா.

கி.மு.மூன்றாம் நூற்றாண்டில் உயிர் எழுத்துக்கள் எப்படி இருந்தன என்று பார்ப்போமா?

2009-02-11T07:41:00.001+05:30

நன்றி: திருமலை நாயக்கர் மகாலில் உள்ள இந்த அரிய படத்தை மின்னஞ்சலில் அனுப்பியவருக்கு

இன்றைய மாணவர்களுக்கு மனபலம் இல்லையா?

2009-02-11T07:27:00.000+05:30

இன்று எந்த ஆசிரியருக்கும் மாணவர்களைத் தண்டிக்கும்/கண்டிக்கும் அதிகாரம் இல்லை. ஒருவேளை ஆசிரியர் கண்டித்தால், இன்றைய மாணவர்கள் தற்கொலை செய்து கொள்ளக்கூட தயங்குவதில்லை. இந்நிலை ஏன்?

இன்றைய கல்வியும், கல்விக்கூடங்களும் ஒரு மாணவனை பொருள் ஈட்டும் இயந்திரமாக மட்டுமே உருவாக்குகிறது என்ற குற்றச்சாட்டு ஒருபுறம் வந்து கொண்டிருக்கிறது. ஆனால், நாம் நம் பிள்ளைகளை ஆசிரியர்கள் தண்டிக்கவோ கண்டிக்கவோ கூடாது என்று சட்டமே இயற்றுகிறோம். பிறகு எப்படி மனிதாபமானமுள்ள, ஒழுக்கமுள்ள மக்கள் நாட்டில் உருவாகமுடியும்?

குருகுலக் கல்விக் காலத்தில், சீடர்கள்தான் குருக்களுக்குத் தேவையான எல்லா பணிவிடைகளையும் செய்தார்கள். ஆனால் இன்று கல்வி வியாபாரமாகிப் போனதால், ஆசியர்களும் இதை எதிர்பார்ப்பதில்லை; மாணவர்களும் பணிவிடை செய்ய தயாராக இல்லை.

கண்மூடித்தனமாக மாணவர்களை அடித்தும் இன்னபிற கொடூரமான தண்டனைகளை அளிக்கும் ஆசிரியர்களுக்கு ஆதரவாக நாம் ஒருபோதும் செயல்படவேண்டாம். அதை நாம் ஆதரிக்கவும் வேண்டாம்.

ஆனால் ஒரு ஆசிரியரின் பொறுப்பு என்பது, கல்வியைத் தவிர்த்து, ஒழுக்கம் கற்பித்தலிலும் இருக்கிறது என்பதை மறவோம். அதற்காக மாணவர்களிடம் சற்றுக் கண்டிப்புடன் இருப்பதில் தவறொன்றும் இலலை.

பெற்றோர்களே.. நீங்களும், உங்கள் பெற்றோர்களும் படித்த காலத்தில் உங்களின் பள்ளி அனுபவம் என்ன?

நாம் படித்த காலத்தில், எந்த ஒரு மாணவனும், மாணவியும் ஆசிரியருக்குப் பயந்து தற்கொலை அளவிற்குப் போனதே இல்லை. நாம் வகுப்பறையில் போடாத தோப்புக்கரணமா இல்லை வாங்காத அடியா?? ஆனால் இன்றைய மாணவர்களுக்கு இதையெல்லாம் தாங்குகிற மனபலம் இல்லையே. இவர்களால் எப்படி வாழ்க்கையில் வரும் தோல்விகளைத் தாங்கிக்கொள்ளமுடியும்? தோல்விகளைத் தாங்கிக்கொள்பவனால்தான், வெற்றியை நோக்கிப் பயணிப்பதற்கு போராடும் குணத்தைப் பெறமுடியும்.

வகுப்பறைகளில் பெறும் ஒருசில தண்டனைகளையெல்லாம் மிகவும் அவமானமாகக் கருதி, கோழைத்தனமான முடிவுகளை எடுக்கின்ற சூழல்தான் இன்று நிலவுகிறது. இப்படிப்பட்ட மனநிலையை மாற்றுகிற மிகப் பெரிய பொறுப்பு பெற்றோர்களையே சார்ந்தது. தனது குழந்தைகளை மனரீதியாகவும் பலப்படுத்துங்கள்.

சமீபத்திய சென்னை சட்டக்கல்லூரி சம்பவத்திற்குக் காரணமாக, மாணவர்களை ஆசிரியர்கள் சரியான ஒழுக்கநெறியோடு வளர்க்கவில்லை என்றும் கூட சொல்லலாம். ஒரு நாட்டின் எதிர்காலம் வகுப்பறையில்தான் உருவாகிறது என்று டாக்டர் ராதாகிருஷ்ணன் சொன்னாரே, அந்த எதிர்காலம் எப்படிப்பட்ட எதிர்காலம் என்று தீர்மானிக்கப்போவது யார்?

உழவன்

பெங்காலி டைகர் இப்போ சின்னத்திரையில்

2009-02-10T08:29:00.003+05:30

பெரிய திரையில் வலம் வரும் ஹீரோயின்கள் தான், சீரியல்களைத் தேடி சின்னத்திரைக்கு வருவார்கள். அதுபோல முன்னாள் கிரிக்கெட் அணி கேப்டன் கங்குலி, பெங்காலி டிவியில் குவிஸ் ஷோ நடத்தப்போவதாக செய்தி வந்துள்ளது.

முகமது அசாருக்குப் பின் இந்திய அணிக்கு அதிக வெற்றிகளைத் தேடித்தந்த பெருமை கங்குலிக்கு உண்டு. இந்திய அணியை கம்பீரமாக வழி நடத்திச் சென்ற கங்குலிக்கு நேரம் சரியில்லையோ என்னவோ, பல்வேறு ஏற்ற இறக்கங்களைக் கண்ட அவரது கிரிக்கெட் வாழ்க்கை சில மாதங்களுக்கு முன் ஓய்வுக்கு வந்தத.

பெங்காலியில் முன்னனி டிவியான ஜீ பங்களா டிவியின் இந்த குவிஸ் ஷோவிற்கு "தாதாகிரி" என பெயர் சூட்டியுள்ளனர்.

வாழ்த்துக்கள் தாதா !

ஈழத் தாலாட்டு

2009-02-10T08:29:00.001+05:30

ஆராரோ ஆரிரரோ

என் செல்ல மகனே

ஈழம் காக்க இங்கு பிறந்த

வேழம் தானே நீயடா

என் செல்ல மகனே !

எங்கோ ஒரு மூலையிலோ

ஏழை வயிற்றினிலோ

அங்கு நீயும் பிறக்காமல்

இங்கு வந்து பிறந்தாயே

என் ஈழ மகனே ..

ஆராரோ ஆரிரரோ

என் செல்ல மகனே

ஈழம் காக்க இங்கு பிறந்த

வேழம் தானே நீயடா

என் செல்ல மகனே !

நீ தூங்க நான் பாடும்

தாலாட்டல்ல இது

என் செல்ல மகனே

தாலாட்டுக்குக் கேட்டுத் தூங்கும்

தலையெழுத்தும் நமக்கில்லை

என் செல்ல மகனே ..

பாட்டின் வழி

நான் ஊட்டும் பாசமடா

தாய்மண் பாசமடா

என் செல்ல மகனே

நாளை இங்கு தமிழ் வாழ

தூக்கம் கொள்ளாது போராடும்

துணிச்சல் வேணுமடா

என் செல்ல மகனே ..

ஆராரோ ஆரிரரோ

என் செல்ல மகனே

ஈழம் காக்க இங்கு பிறந்த

வேழம் தானே நீயடா

என் செல்ல மகனே !

நேற்றுனக்கு தொட்டில் கட்டிய

வேப்பமரம் இப்போதில்லையே

என் செல்ல மகனே

சமாதிக்குப் பறித்துப்போட்ட

பூக்கள் வாடும்முன்னே

நாம் கூட சமாதியாகலாம்

என் செல்ல மகனே ..

சிந்திய நம் குருதியால்

இந்தியப் பெருங்கடல்

சிவந்தது என் செல்ல மகனே

மார்பினில் குண்டு தாங்கி

மண்ணில் உரமான

மாவீரனின் வாரிசு நீ

என் செல்ல மகனே ..

ஆராரோ ஆரிரரோ

என் செல்ல மகனே

ஈழம் காக்க இங்கு பிறந்த

வேழம் தானே நீயடா

என் செல்ல மகனே !

மண்ணைக் கரைத்துதான்

சேனை வைத்தான் உன்

மாமன்காரன்

என் செல்ல மகனே

ஈழக்குருதி சிந்திய

யாழ்மண்ணில் செய்த

பொம்மைதான் உன் கையிலிருக்கு

என் செல்ல மகனே ..

ஆராரோ ஆரிரரோ

என் செல்ல மகனே

ஈழம் காக்க இங்கு பிறந்த

வேழம் தானே நீயடா

என் செல்ல மகனே !

நாளைய சூரியன்

நமக்காகத்தான் என் செல்ல மகனே

நம்பிக்கையோடு போராடுவோம்

என் செல்ல மகனே ..

ஆராரோ ஆரிரரோ

என் செல்ல மகனே

ஈழம் காக்க இங்கு பிறந்த

வேழம் தானே நீயடா

என் செல்ல மகனே !

உழவன்

தமிழின் சிறப்பு - பிதாகரஸ் தியரம் (Pythagoras Theorem)

2009-02-09T17:19:00.001+05:30

இன்று நாம் அனைவரும் சொல்லிக்கொண்டிருக்கின்ற பிதாகரஸ் தியரம் (Pythagoras Theorem) என்ற கணித முறையை, பிதாகரஸ் என்பவர் கண்டறிவதற்கு முன்னரே, போதையனார் என்னும் புலவர் தனது செய்யுளிலே சொல்லியிருக்கிறார்.

ஓடும் நீளம் தனை ஒரேஎட்டுக்

கூறு ஆக்கி கூறிலே ஒன்றைத்

தள்ளி குன்றத்தில் பாதியாய்ச் சேர்த்தால்

வருவது கர்ணம் தானே. - போதையனார்

இக்கணித முறையைக் கொண்டுதான், அக்காலத்தில் குன்றுகளின் உயரம் மற்றும் உயரமான இடத்தை அடைய நாம் நடந்து செல்லவேண்டிய தூரம் போன்றவைகள் கணக்கிடப்பட்டுள்ளன.

போதையனார் தியரத்தின் சிறப்பம்சம் என்னவென்றால், வர்க்கமூலம் (Square root) இல்லாமலேயே, நம்மால் இக்கணிதமுறையை பயன்படுத்த முடியும்.

- தமிழ்மண வாசகர்களுக்காக இது மறுபதிப்பு செய்யப்படுகிறது.

சென்னை கிரிக்கெட்

2009-02-09T10:52:00.000+05:30

ஆட்டம் பரபரப்பாகவும்

விறுவிறுப்பாகவும்

போய்க்கொண்டிருந்தது

பவுண்டரியில் ஃபீல்டிங்

செய்த நான்

பறந்து வந்த பந்தை

வேகமாய் ஓடிச்சென்று பிடித்துவிட்டு

விக்கெட் விழுந்த

மகிழ்ச்சியில் துள்ளிக் குதித்தேன்

என்னைப் போலவே

எனதருகில் நின்று

ஃபீல்டிங் செய்த ஒருவர்

"பாஸ்.. அது எங்க பால்"

என்றபோதுதான்

எனக்குப் புரிந்தது

அவன் பிடிக்க வேண்டிய பந்தை

நான் பிடித்து

அவர்களுக்கு

ஃபீல்டிங் செய்துள்ளேன் என்று !

தீப்பெட்டிக்குள்

அடைக்கப்பட்ட குச்சிகள் போன்று

இருந்த மைதானத்தைப் பார்த்தபோது

மிளகாய் மாரு பிடுங்கப்பட்ட

பல ஏக்கர் பொட்டல்காட்டில்

பதினோரு பேரு கூட இல்லாமல்

கிரிக்கெட் ஆடிய

அந்த நினைவுகள்

சச்சின் அடித்த பவுண்டரியாய்

விர்ரென்று ஒரு விநாடி வந்து போனது !

உழவன்

உப்பின் மகத்துவம் தெரியுமா உங்களுக்கு?

2009-02-06T11:29:00.000+05:30

சொட்டை மண்டையில் முடி முளைக்க:

உப்பை நன்றாக தூள் செய்து தினசரி 3 அல்லது 4 வேளை தேய்த்து வர மயிர் முளைக்கும்.

முள் குத்தின வலிக்கு:

உப்பு, மிளகு சரி எடை எடுத்து நல்லெண்ணெயில் வதக்கிக் கொண்டு ஒத்தடம் தந்தால் இதம் தெரியும்.

நகச்சுற்று மறைய:

உப்பு, வெங்காயம், சுடுசோறு இம்மூன்றையும் சம அளவு அரைத்து கட்ட நகச்சுற்று குணமாகும்.

காதில் எறும்பு அல்லது சிறுபூச்சி புகுந்துவிட்டால்:

கொஞ்சம் உப்பை நீரில் கரைத்து காதில் விட்டால் எந்த பூச்சியும் வெளியேறும்.

விஷக்கடிக்கு:

குளவி, சிலந்தி போன்ற விஷப்பூச்சிகள் கொட்டினால், கடித்தால் உப்பைக் கொஞ்சம் தண்ணீரில் போட்டு, கெட்டியாகக் கரைத்து, கடி வாயில் தடவினால் குணமாகும். சர்க்கரைத் தண்ணீரில் சில துளி உப்புத் தண்ணீர் விட்டு குடிப்பதும் நல்லது.

உப்பின் பிற பயன்கள்:

* நெய்யில் ஒரு தேக்கரண்டி உப்பைப் போட்டு சுடவைத்தால் நெய் நீண்ட நாள் கெடாமல் இருக்கும்.

* மண்ணெண்ணெயில் சிறிது உப்பு கலந்து விளக்கேற்றினால் மண்ணெண்ணெய் சீக்கிரம் தீராது.

* அரிசியை நீண்ட நாட்கள் சேமித்து வைக்கும்போது சிறிது உப்புத் தூளையும் கலந்துவிட்டால் புழு, பூச்சி வராமல் பாதுகாப்பாக இருக்கும்.

* துருப்பிடித்த சாமான்கள் மீது உப்பு தேய்ப்பின் துரு நீங்கி பளபளக்கும்.

* வீட்டில் தரை கழுவும்போது, சிறிது உப்பையும் நீரில் கலந்து கழுவினால், காய்ந்த பிறகு தரையில் ஈக்கள் மொய்க்கும் தொல்லையிராது.

இதுமட்டுமல்ல .. உப்பிட்டவரை உள்ளளவும் நினைக்கனுமாம் !

- தமிழ் மருத்துவம் நூலிலிருந்து

ஈழத் தமிழர்களுக்கு ஆதரவாக கனடாவில் மனிதச்சங்கிலி: 80,000 பேர் பங்கேற்பு

2009-01-31T12:13:00.000+05:30

ஈழத் தமிழர்களுக்கு ஆதரவு தெரிவித்தும், தமிழீழ விடுதலைப்புலிகளுக்கு எதிராக சிறிலங்க ராணுவம் நடத்தி வரும் போரை நிறுத்தக் கோரியும் கனடா வாழ் தமிழர்கள் டொரன்டோ நகரில் மனிதச்சங்கிலி போராட்டம் நடத்தினர்.

நேற்று மதியம் 12 மணிக்குத் துவங்கி மாலை 6 மண் வரை நடந்த இந்தப் போராட்டத்தின் போது டொரன்டோ நகரில் காணப்பட்ட கடும் பனிப்பொழிவையும் பொருட்படுத்தாமல் 80 ஆயிரத்திற்கும் அதிகமானோர் பங்கேற்றதாக அந்நாட்டுச் செய்திகள் தெரிவிக்கின்றன.

இலங்கையில் ஈழத் தமிழர்கள் வாழும் பகுதிகள் மீது சிறிலங்க ராணுவம் நடத்திய கொடூரத் தாக்குதலில் பலியான அப்பாவி மக்கள், குழந்தைகளின் உடல்கள் கொண்ட புகைப்படங்கள், ஈழத்தமிழர்களுக்கு ஆதரவாக சென்னையில் உயிர்த்தியாகம் செய்த முத்துக்குமார் ஆகியோரின் படங்கள் கொண்ட பதாகைகளாக ஏந்தி ஊர்வலத்தில் ஏராளமானோர் கலந்து கொண்டனர்.

பொருளாதார மையத்தை சுற்றிச் செல்லும் சுமார் 15 கி.மீ. சுற்றளவு உடைய பிரதான சாலைகளில், தமிழர்கள் ஒருவருடன் ஒருவர் கைகோர்த்து நின்று தமது உணர்வுகளை வெளிப்படுத்தினர்.

அந்நாட்டின் முக்கிய செய்தி ஊடகங்கள் அனைத்தும் தமிழர்களின் மனிதச்சங்கிலி போராட்டத்தை நேரடி ஒளிபரப்புச் செய்தது குறிப்பிடத்தக்கது.

சிறிலங்க ராணுவத்தின் முற்றுகைக்குள் அகப்பட்டிருக்கும் தமிழர்களுக்கு நிவாரணம் சென்றடைய கனடா அரசாங்கம் அழுத்தம் கொடுக்க வேண்டும் எனவும் பேச்சுவார்த்தைக்கான தளத்தை அமைப்பதில் முக்கிய பங்காற்ற வேண்டும் எனவும் தமது கோரிக்கைகளை கனடா வாழ் தமிழர்கள் முன்வைத்தனர்.

இலங்கையில் உயிரிழந்த, பாதிக்கப்பட்ட தமிழர்கள் ஒவ்வொருவருக்கும் ஆதரவாக இங்கே நாங்கள் குரல் கொடுக்கிறோம் என மனிதச்சங்கிலிப் போராட்டத்திற்கு அழைப்பு விடுத்த அமைப்பாளர் சுபான்கி கலநந்தன் அந்நாட்டு செய்தி நிறுவனம் ஒன்றிற்கு தெரிவித்துள்ளார்.

அடுத்தடுத்த நாட்களில் கனடாவின் முக்கிய நகரங்களான ஒட்டாவா, மான்ரியல், கல்கேரி மற்று வன்கோவர் ஆகியவற்றிலும் மனிதச்சங்கிலி நடத்த கனடா வாழ் தமிழர்கள் திட்டமிட்டுள்ளனர்.

கனடாவில் இயங்கும் தமிழ் வானொலி ஒன்றுக்கு பேட்டியளித்த அந்நாட்டின் முக்கிய அமைச்சர் ஒருவர், ஒரே நேரத்தில் இவ்வளவு மக்கள் திரண்டு தமது உணர்வுகளை வெளிப்படுத்தியதைத் தாம் மதிப்பதாகவும், கனடா வாழ் தமிழர்களின் மன வலியை தாம் புரிவதாகவும் தெரிவித்ததோடு, இந்த விவகாரம் தொடர்பாக தானும் இதர அமைச்சரவைச் சகாக்களும் கலந்தாலோசித்து கூடிய விரைவில் ஒரு முடிவுக்கு வர இருப்பதாகவும் அவர் கூறியதாக புதினம் இணையதள செய்தியில் தெரிவிக்கப்பட்டுள்ளது.

மின்சாரம் பெற இனி 'ரீ-சார்ஜ் கூப்பன்'

2009-01-28T11:04:00.000+05:30

வீடுகளுக்கு வழங்கப்படும் மின்சாரத்தை பெற இனி "ரீ-சார்ஜ் கார்டு' வாங்கி தேவையான அளவு உபயோகித்து கொள்ளும் முறை அறிமுகப்படுத்தப்படவுள்ளது.வீடு, அலுவலகங்களுக்கு பயன்படுத்தப்படும் மின்சார அளவை கணக்கிட்டு மின் வாரியத்தில் கட்டணம் வசூலிக்கப்படுகிறது. தற்போது சென்னையில் மட்டும் மின் கட்டணத்தை இன்டர்நெட்டில் செலுத்தும் முறை உள்ளது. அலைச்சல், நேரம் மிச்சமாவதால் சென்னையில் இதற்கு பெரும் வரவேற்பு உள்ளது.

இதனையடுத்து மின் வாரியம் சாப்ட்வேர் கம்பெனிகளின் உதவியுடன் ரீ-சார்ஜ் முறையில் மின்சாரத்தை வழங்கும் புதிய திட்டத்தை அறிமுகம் செய்யவுள்ளது. இதற்காக பெங்களூருவில் உள்ள சாப்ட்வேர் கம்பெனியில் மொபைல் போன்களுக்கு டாப்-அப் கார்டு மூலம் பேசுவது போல மின்சாரத்தை பயன்படுத்தும் பொதுமக்கள், மின் இணைப்பு பெற்றுக்கொண்டு மாதாமாதம் தங்களுக்கு தேவையான மின்சாரத்தை டாப்- அப் கார்டுகள் மூலம் ஸ்கிராட்ச் செய்து உயயோகப்படுத்தும் வகையில் புதிய சாப்ட்வேர் உருவாக்கப்பட்டுள்ளது.

இதில் தற்போதுள்ள மீட்டரை மாற்றி சாதாரண பொதுமக்கள் வாங்கும் விலையில் புதிய மீட்டரை உருவாக்கும் பணி நடைபெற்று வருகிறது. இப்பணிகள் நிறைவு பெற்ற பின் சென்னை போன்ற பெருநகரங்களில் அறிமுகம் செய்யப்படும். இந்த ரீசார்ஜ் கூப்பன்களை அரசின் அங்கீகாரம் பெற்ற நிறுவனங்களில் பெற்று தேவையான அளவு மின்சாரத்தை பயன் படுத்திக்கொள்ளலாம். இது குறித்து மின்வாரிய உயர் அதிகாரி ஒருவர் தெரிவித்ததாவது;

இந்த புதிய முறை நடைமுறைப்படுத்தும் போது பொதுமக்கள் அதிகம் பயன் அடை வார்கள். வீடு, அலுவலகங்களில் பயன்படுத்தப்படும் மின் அளவு வெகுவாக குறையும். இந்த புதிய முறை பெரிய கனரக தொழிற்சாலைகளுக்கு பயன் படுத்துவதில் சிரமம் ஏற்படும் . இது நடைமுறைக்கு வர ஒரு ஆண்டு ஆகலாம்' என்றார்.

- செய்தி

இசை மருத்துவம் - இசை கேளுங்கள் ! இன்பமாய் வாழுங்கள் !

2009-01-22T08:54:00.000+05:30

நரம்பு மண்டலத்தைச் சீர்படுத்துவதில் இசையின் மருத்துவகுணம் மகத்தானது. எல்லா உணர்வுகளையும் தூண்டவும் அதே நேரத்தில் அமுக்கவும் அதற்குரிய இசை உண்டு.

நரம்பு சம்பந்தமான கோளாறுகள், நரம்புத் தளர்ச்சி, சோகமான நிகழ்வால் ஏற்படும் அதிர்ச்சிகள் இவற்றைப் போக்கடிக்க, இதற்கென உண்டான இசையைக் கேட்டாலே பலன் தெரியும்.

இசை மருத்துவச் சிகிச்சையென்பது, நோயாளியே இசைக்கருவியை இயக்குதல் அல்லது பாடுதலாகும். இது முடியாதவர்கள்தான் இசையைக் கேட்டு ரசித்து மகிழவேண்டும்.

அமெரிக்காவில் ஒரு பல் மருத்துவர், மயக்க மருந்தோ அல்லது வலிக்குறைப்பு மருந்தோ இல்லாமல், இசையை எழுப்பியே நூற்றுக்கணக்கான நோயாளிகளுக்கு சிகிச்சையளித்துள்ளார் என்று ஒரு செய்தி உள்ளது.

ஹிஸ்டீரியா என்ற நோயை நரம்புக் கருவிகளின் இன்னிசை விரட்டிவிடும் என்ற நம்பிக்கையும் உள்ளது.

ஒரு நபர் மட்டுமே மீட்டுகின்ற வயலின் இசையைக் கேட்டாலே, கொடிய தலைவலியும் ஓடோடிவிடுமாம்.

பாஸ்டனில் இசையைக் கொண்டு, சுகப்பிரசவம், இதய அறுவைச் சிகிச்சை போன்றவைகள் நடைபெறுவதாக படித்த ஞாபகம் உண்டு.

உடலுக்கும், மனதிற்கும் வருகின்ற எந்த நோயையும் குணப்படுத்தும் ஆற்றல் இசைக்கு உண்டு.

இசை கேளுங்கள் ! இன்பமாய் வாழுங்கள் !

- படித்ததும், பாட்டி சொன்னதும்

வித்தியாசம்

2009-01-06T11:53:00.000+05:30

10 பைசா கேட்டால் பிச்சைக்காரன்

10 லட்சம் கேட்டால் மாப்பிள்ளை

"தமிழோடு" க்காக

அசோக்குமார்

தமிழர்களைப் பாதுகாக்கத் தவறிய காங்கிரஸை தமிழகக் கட்சிகள் புறக்கணிக்குமா?

2009-01-05T10:24:00.001+05:30

இலங்கை பிரச்னையில் மத்திய அரசின் உணர்ச்சியற்ற அணுகுமுறைக்கு காலம் கடப்பதற்குள் விடை தெரிய வேண்டும் என்று, பிரதமர் மன்மோகன் சிங்கை பாமக நிறுவனர் ராமதாஸ் கேட்டுக் கொண்டிருக்கிறார்.

இது தொடர்பாக பிரதமருக்கு அவர் எழுதிய கடித்தத்தில் கூறியிருப்பதாவது:

இலங்கை பிரச்னை தொடர்பாக டிசம்பர் 4ஆம் தேதி முதல்வர் கருணாநிதி தலைமையில் அனைத்துக் கட்சித் தலைவர்கள் உங்களை நேரில் சந்தித்துப் பேசினோம்.

ஒரு மாதம் கடந்துள்ள நிலையில் இதுவரை எந்தவிதமான நடவடிக்கையும் எடுக்கப்படவில்லை. இலங்கை பிரச்னைக்கு அமைதி வழியில் அரசியல் தீர்வு காண வேண்டும் என்று தாங்கள் கூறியதை இங்கு நினைவு கூறுகிறேன்.

இலங்கை பிரச்னை தொடர்பாக டெல்லியின் உணர்ச்சியற்ற, அக்கறையற்ற அணுகுமுறையைத் தான் இது காட்டுகிறது. டெல்லி அதிகாரிகளுக்கு தமிழர்களைவிட இலங்கை அரசு தான் முக்கியமாகப்பட்டுள்ளது.

தமிழர்களின் கவுரவம், சுய மரியாதை குறித்து டெல்லி அதிகாரிகளுக்கு அக்கறை இல்லையா? இதையே இறுதி பதிலாக எடுத்துக் கொள்ளலாமா? காலம் கடப்பதற்கு முன் எங்களுக்கு விடை தேவை.

இவ்வாறு ராமதாஸ் கூறியுள்ளார்.

கேள்வி:

விடுதலைப் புலிகளின் தலைவன் பிரபாகரனை உயிரோடு பிடித்தால், இந்தியாவிடம் ஒப்படைக்க வேண்டும் என சமீபத்தில் மத்திய அமைச்சர் இலங்கை அரசைக் கேட்டுக்கொண்டதிலிருந்தே மத்திய அரசின் நிலை என்ன என்று எல்லா தமிழர்களும் அறிவர். அப்பாவித் தமிழர்களின் உயிரோடும் உடைமைகளோடும் விளையாடும் இந்த காங்கிரஸோடு வருகின்ற பாராளுமன்ற தேர்தலில் எந்தத் தமிழகக் கட்சிகளும் கூட்டணி அமைக்காமல் இருந்தால்தான், நாம் அனைவரும் இன உணர்வுள்ள தமிழர்கள். பதவி சுகம் கண்ட தமிழகத்தில் இது நடக்குமா?

அரசியல் கட்சிகள் இதில் தவறினால், தமிழனைப் புறக்கணிப்போரை மக்கள் நாம் புறக்கணிப்போம்.

பண்டிகைச் சோறு

2009-01-05T10:24:00.000+05:30

நான்கு தெருவாவது

சென்றால்தான்

ஒரு வேளை சோறு

இன்று

புத்தாண்டாம்

முதல் தெருவிலேயே

என் சோற்றுப்பாத்திரம்

நிரம்பி வழிகிறது

யாருக்குத் தெரியும்

நேற்று நான்

பட்டினி கிடந்தது !

பசிக்கு சோறுபோடக் கூட

பண்டிகை நாட்கள் வேண்டுமோ?

உழவன்

'கிலி' வீழலாம். ஆனால் புலி வீழ மாட்டார்கள் : வைரமுத்து

2009-01-03T10:55:00.000+05:30

கிளிநொச்சி விழுந்த செய்தி கேட்டு நெஞ்சில் இடி விழுந்தது என்று தமிழ்நாட்டின் பிரபல கவிஞர் வைரமுத்து தெரிவித்துள்ளார்.

கவிஞர் வைரமுத்து புத்தக வெளியீட்டு விழாக்களில் முதலமைச்சர் கருணாநிதி ஆற்றிய 11 இலக்கிய சொற்பொழிவுகள் புத்தகமாக தொகுக்கப்பட்டுள்ளது.

"என் தம்பி வைரமுத்து'' என்று பெயரிடப்பட்டுள்ள இப்புத்தகத்தின் வெளியீட்டு விழா சென்னையில் நேற்று வெள்ளிக்கிழமை நடைபெற்றது.

விழாவுக்கு குன்றக்குடி பொன்னம்பல அடிகள் தலைமை தாங்கி, புத்தகத்தின் முதல் பிரதியை வெளியிட நாடாளுமன்ற உறுப்பினர் கவிஞர் கனிமொழி பெற்றுக்கொண்டார்.

இந்நிகழ்வின் முடிவில் கவிஞர் வைரமுத்து ஏற்பு உரையாற்றிய போது மேலும் தெரிவித்துள்ளதாவது:

இன்று கிளிநொச்சி வீழ்ந்துவிட்டது என்ற செய்தி வருகிறது. நெஞ்சில் இடி விழுகிறது. ஒரு தமிழன், தமிழ் சகோதரி அங்கு அடிபடுகிற போது, எனக்கு குளிப்பதற்கோ, உண்பதற்கோ, சிரிப்பதற்கோ தோன்றவில்லை. கிளிநொச்சி வீழலாம். 'கிலி' வீழலாம். ஆனால் புலி வீழ மாட்டார்கள். அவனும் சேர்த்து தான் தமிழர். அவன் நம் இரத்தத்தின் நீட்சி. அவனை இழப்பதற்கு நாம் தயாராக முடியாது.

நாங்கள் போர் நிறுத்தம் வேண்டும் என்று கேட்கிறோம். பிரணாப் முகர்ஜி இலங்கைக்கு செல்ல வேண்டும் என்று கேட்டுக்கொண்டோம். அங்கே போர்முனைக்கு செல்லுமாறு வேண்டிக்கொண்டோம். இன்னும் காலம் கடந்துவிடவில்லை.

இலங்கையில் போர் நிறுத்தத்தை எவ்வளவு வலியுறுத்துகிறோமோ அதைப் போல இந்தியாவுக்கும்- பாகிஸ்தானுக்கும் போர் வந்துவிடக்கூடாது என்பதும் முக்கியம். பொருளாதார சீரழிவு வந்து கொண்டிருக்கும் நேரத்தில் இன்னொரு போரை உலகம் தாங்காது. பாகிஸ்தானில் தீவிரவாத முகாம்கள் ஒழிக்கப்படவேண்டும். போர் மூலம்தான் அது நிறைவேற்றப்பட வேண்டும் என்பதில் எனக்கு உடன்பாடில்லை என்றார் அவர்.

புத்தாண்டு வாழ்த்து !

2009-01-01T09:01:00.000+05:30

ஜனவரி

மாதமுள்ள

காலண்டர் போல

மகிழ்ச்சி

தடித்திருக்க

வாழ்த்துவோம் !

டிசம்பர்

மாதம் மட்டுமே உள்ள

காலண்டர் போல

துன்பம்

மெலிந்திருக்க

வேண்டுவோம் !

உழவன்

நினைவு தினம்

2008-12-26T09:03:00.000+05:30

ஒரு சொட்டுக்

கண்ணீரில்

சிதைந்து போன

விடைக்கு

முழு மதிப்பெண் !

ஓடிப் பிடித்து விளையாடிய

கடற்கரை மணலில்,

நண்பனைத் தொலைத்த ஞாபகம்

ஒரு வினாடி

வந்துபோனது

நடந்து முடிந்த

அரையாண்டுத் தேர்வில்

சுனாமி வந்த தினம் எது?

என்ற வினாவிற்கு

விடையளிக்கும்போது !

உழவன்

ஏனோ?

2008-12-05T09:11:00.003+05:30

பத்து ரூபாய்

தோசைக்கு

முப்பதும்,

பதினைந்து ரூபாய்

பழச்சாறுக்கு

நாற்பதும் கொடுத்ததோடு

பகட்டுக்காக

டிப்ஸ் வேறு கொடுத்துவிட்டு,

வாசல்முன் வந்து நிற்கும்

காய்கறிகாரனிடமும்

அறுந்துபோன செருப்பைத்

தைத்துக் கொடுப்பவனிடமும்

இரண்டு ரூபாயாவது

பேரம் பேசாவிட்டால்

மனம் அடங்காது

போவது ஏனோ?

உழவன்

http://tamiluzhavan.blogspot.com/

http://tamizhodu.blogspot.com/

சென்னையில் ஒரு மழைக்காலம்

2008-11-28T17:42:00.003+05:30

http://www.flickr.com/photos/karthik_r/3065758528/

செல்போனின் தரத்தை அறிந்து கொள்ளுங்கள்!

2008-11-24T11:26:00.001+05:30

காலையில் தூக்கத்திலிருந்து விழித்து எழுந்தது முதல் இரவு தூங்கப்போகும் வரை உபயோகப் படுத்தக்கூடிய பொருட்கள் எல்லாமே தரமானதாக இருக்க வேண்டும் என்று நாம் ஒவ்வொருவரும் விரும்புவோம்.

அப்படி அன்றாடம் உபயோகிக்கக்கூடிய பொருள்களில் செல்போன் அதிமுக்கியமான பொருளாக மாறியுள்ள கால கட்டத்தில் நாம் வாழ்ந்து கொண்டிருக்கிறோம். குடும்பத்திற்கு ஒன்று என்றிருந்த நிலை மாறிப்போய் தனி நபரொருவர், ஒன்றிற்கு மேல் செல்போன்களை பயன்படுத்துகின்ற சூழ்நிலையில் இருந்து கொண்டிருக்கிறோம்.

செல்போன்களை அதிகமான நேரம் பயன்படுத்துவதால் ஏற்படக்கூடிய பாதிப்புகள் அதிகளவில் இருக்கிறது என்ற உண்மையை யாரும் மறுக்க முடியாது. இந்த செய்தியின் மூலம் நாம் வாங்கியிருக்கின்ற அல்லது வாங்கப்போகின்ற செல்போன்களின் தரம் என்ன என்பதை தெரிந்துக் கொள்வோம். அதாவது நாம் அன்றாடம் உபயோகிக்கும் பொருள்களின் தரம் உயர்ந்த அல்லது குறைவான அல்லது போலியான பொருட்கள் மார்க்கெட்டில் வலம் வந்து கொண்டிருக்கின்ற சூழலில் செல்போனின் தரத்தை எதனை அடிப்படையாக கொண்டு நிர்ணயிப்பது பற்றி அறிவோம்.

உங்களுடைய செல்போனில் *#06# என்று அழுத்திய உடன் நீங்கள் பயன்படுத்தக் கூடிய செல்போனில் அடையாள நம்பர் 15 இலக்கங்களில் தெரியவரும்.

அப்படி கிடைக்ககூடிய எண்களில் 7 மற்றும் 8வதாக வரக்கூடிய எண்களை கீழ்கண்ட பட்டியலோடு ஒப்பிட்டு பார்த்து உங்களின் செல்போனின் தரத்தை அறிந்து கொள்ளுங்கள்.

7 மற்றும் 8வது எண் 00 என்றிருந்தால் தரமான தொழிற்சாலையில் தயாரித்தது என்பது மட்டுமல்ல உங்களின் செல்போனும் மிக மிக தரம் உயர்ந்தது என்பதை குறிக்கும். (மிக மிக நன்று)

7 மற்றும் 8வது எண் 01 அல்லது 10 என்றிருந்தால் தயாரித்த நாட்டின் பெயர் பின்லாந்து மற்றும் தரமான பொருள் என்பதை குறிக்கும். (மிக நன்று)

7 மற்றும் 8வது எண் 08 அல்லது 80 என்றிருந்தால் தயாரித்த நாட்டின் பெயர் ஜெர்மனி மற்றும் தரம் தாழ்ந்தது அல்ல என்பதை குறிக்கும். (நன்று)

7 மற்றும் 8வது எண் 02 அல்லது 20 என்றிருந்தால் ஒருங்கிணைப்பு செய்தது துபாயில். தரமான பொருள் அல்ல என்பதை குறிக்கும். (சுமார்)

7 மற்றும் 8வது எண் 13 என்றிருந்தால் தரம் குறைந்த பொருள் கொண்டு உருவாக்கப்பட்டது மற்றும் உடல்நலத்திற்கு கேடு விளைவிக்ககூடியதுமாகும். (மோசம்)

மேற்சொன்ன செய்திகள் அனைத்தும் எதிர்வரும் காலங்களில் தரமான செல்போன்களை தேர்ந்தெடுக்க உதவியாக இருக்கும் என்பதற்காகவே இந்த தகவல்களை இங்கே குறிப்பிடப்பட்டுள்ளது.

குறிப்பு: மேற்கண்ட தகவல் எந்த அளவிற்கு உண்மையானது என்பது தெரியவில்லை. தெரிந்தவர்கள் ஆதாரங்களை வெளியிடலாம்.

நன்றி: இத்தகவலை மின்னஞ்சலில் அனுப்பிய நண்பருக்கு.

மின் தட்டுப்பாடு

2008-11-18T11:12:00.001+05:30

பள்ளிக் குழந்தைகள்

பாடம் படித்துக் கொள்ளட்டும்

சூரியனே..

உன் மாலைப் பொழுதை

சற்று நீட்டித்துக் கொள் !

வீட்டு பட்ஜெட்டில்

மெழுகு வர்த்தியின்

எண்ணிக்கையாவது

சற்றுக் குறையட்டும்

மின்மினிப் பூச்சிகளே

எங்கள் வீட்டிற்குள்

வந்து விளையாடுங்கள் !

எரியாத தெருவிளக்கின் அடியில்

எப்படி பூ விற்பாள்

எங்கள் ஊர் பூக்காரி ?

நிலாவே

அமாவாசையன்றும் கூட

சிறிது நேரம் வந்துவிட்டு போ !

எரியும் அடுப்பின் வெளிச்சத்தில்

எப்படி எங்களால்

ஒரு ருபாய் அரிசியில்

கல் பொறுக்க முடியும் ?

பூமிக் கூரையிலிருக்கும்

விண்மீனே .. எங்கள்

கூரை வீட்டுக்குள்ளும் வருவாயா?

இருக்கிறது என்பதற்காக

இருளைப் பகலாக்கி

விளையாட்டுப் போட்டி கண்டோம் !

குளிர் காலத்தில் கூட

குளிர் அறை கேட்டோம் !

முழத்துக்கொரு விளக்கு வைத்து

பொதுக்கூட்டம் போட்டோம் !

கொசு மட்டுமே நடமாடும்

நடு இரவில் கூட

விளக்கு வைத்து

விளம்பரப் பலகையை

மினுங்க வைத்தோம் !

அலங்கார விளக்குகள் நடுவே

அமைச்சரை அழைத்து வந்தோம் !

இருந்தது தீர்ந்ததால்

இருளாகிப் போனது இப்போது !

இயற்கையே ...

இருளைப் போக்க

நீ

வருவது எப்போது ?

உழவன்

http://tamiluzhavan.blogspot.com/

http://tamizhodu.blogspot.com/

பலூன்

2008-11-14T10:54:00.002+05:30

" எங்கள்

வயிறு வெடித்தால் தான்

முதலாளியின் வயிறு நிறையும் "

கடற்கரையில்

துப்பாக்கிகளுக்கு எதிரே

அட்டையில்

அடுக்கி வைக்கப்பட்டிருக்கும்

பலூன்கள் சொல்கின்றன !

உழவன்

கரிசக் காட்டுப் பொண்ணு

2008-11-08T11:54:00.001+05:30

அதிகால எந்திரிச்சு

அள்ளி முடிஞ்சி

அடச்ச கோழி திறந்து விட்டு

ஆடு மாடு சாணம் அள்ளி

முத்தம் பெருக்கி

வாச தெளிச்சி

பருத்தி மாரெடுத்து பத்த வச்சி

துருத்தி போல வாயால ஊதி

கடுங்காப்பி கொதிக்கும்போது

தட்டி என்ன எழுப்பிடுவா !

பக்கத்துக் கம்மாயிக்கே

பத்து நடை போகனுமேனு

ரெட்டைக் குடம் சுமந்து

பத்துக் குடம் தண்ணியெடுப்பா !

ஆட்டுக் குட்டிக்கு

அறுத்து வந்த அகத்திக்கீரையில

அஞ்சாறு ஆஞ்செடுத்து

பச்சவாடை போகும்வரை

பக்குவமாய் வதக்கி வச்சி

பழைய சோத்துக்கே ருசி சேத்திடுவா !

மாட்டு வண்டி போட்டுக்கிட்டு

மத்தியானக் கஞ்சியோடு

மாமன் நான் போகும்போது

தட்டைப் பயறு அவிச்சி

தாளிச்சுக் கொடுத்தனுப்புவா !

மஞ்சனத்தி நிழலில

கஞ்சி குடிக்கும் பொழுதில

மகராசி அவள நெனப்பேன்

தின்னாளோ இல்லையானு நான் தவிப்பேன்

அவிச்சித் தந்த பயறில

அவளுக்காக மிச்சமும் வைப்பேன்

பொழுது சாஞ்சி வீடு போயி

அவ கையில நான் கொடுப்பேன் !

பொட்டப்புள்ள பெத்ததால

பொங்கலு தீபாவளி

எங்களுக்கு இல்ல

பொசுக்குனு செலவழிக்க

பொட்டியில காசும் இல்ல - அவ

காடு கரைக்குப் போகாத நாளுமில்ல

கடைசிவரை உழைக்காத பொழுதுமில்ல !

களை எடுப்பா கதிர் அறுப்பா

பாத்தி கட்டி நாத்தும் நடுவா

வயசு வந்த பொண்ணுக்காக

வாயக்கட்டி வயித்தக்கட்டி சேத்துவப்பா!

தாலி கட்டுன நாளுல இருந்து

பேரன் பேத்தி எடுத்தது வரை

உனக்குனு ஒருநாளும் நீ வாழலியே

வீதியில என்ன விட்டுவிட்டு

நீ மட்டும் இப்ப பரலோகம் போறீயே!

என் முழு உசுரும் நீ தானடி

இப்போ நீ இல்ல நான் பிணம் தானடி

உனக்கு மட்டுமா இந்த ஆறடி

நானும் வாரேன் கூட்டிட்டுப் போடி!

உழவன்